مجرد انسان

ودونت فى شعرى قصص العاشقين اجمعين ورسمت منهم لوحات تسر الناظر غير مكترثين منهم من يهتم ويدرك ما حدث للسابقين ومنهم من يغفل وتعجبهم الكلمات مبتسمين انظر معى لعاشق ضحى بحياته فى سبيل الحبيب فترى حبيبته تهيم على وجهها فى دنيا الخيال الغريب حب امامها ينتظر اهتمامها بحرارة ولهيب وتبحث هى عن شىء مفقود عسى يكون قريب تتعجب لحالك بعد تضحيتك بروحك واذا هى تغيب فاين تجد روحك الان وسط بحور المغيب؟ انظر لعاشق قدم قلبه هدية لمن احبه وقدمت هى ما تملك فى سبيل حبه رسموا مستقبل حافل ودنيا مليئة بالرومانسيه وعزموا الا يدخل بين قلوبهم الغربه اكتشف حبها لصديقه واعز من عرفه فماذا يفعل المسكين غير انسحابه بكل زل وعزه؟ انظر معى لعاشق عزم السفر والترحال ورجوعه لحبيبته بكل ما كسب من مال قرر الصمود فى سبيل من يعشق جميلة الجميلات ولا يدرى ان الجمال لا يتحمل صمود الجمال رجع ووجدها مع غيره فى حب وراحة البال فماذا يفعل غير رجوعه للغربة والاموال؟ انظر لعجائب طفل كبر على حب النساء وكتب فيهم من القصائد ما يشعرك بالشقاء تخيل نفسه مكان الف عاشق بصفاء وينتظر كتابة قصائده على تجاربه دون عزاء اكتشف انه فى اخر عمره ويكتب فى الرثاء فاين الحب ايها المسكين واين العطاء؟ انظر لعاشق صادف امراة مره او مرتان لكنها لا تغيب عن نظره مهما طالت الازمان يبحث عنها فى كل موطن وكل مكان احبها نعم ولا يستطيع عشق غيرها اى انسان فاين ذهبت واخذت ابتسامة فنان وماذا هو فاعل غير صمته المخيم على المكان؟ انظر معى لعاشق ابعدته الدنيا عن من اختار واختارته واحبته وتمنت ان يكون لها دون اخطار عاشوا اجمل قصص الحب على موسيقى الاوتار وفرقت بينهم الدنيا دون فهم او انذار يتسائلون عن بعضهم من غربة لغربة وانكسار فمتى الزمن الجامع بينهم وذهاب الاعزار؟ جف قلمى وجفت دموعى على حال العاشقين عسى ان يكرموا فى قبورهم ويكونوا من المكرمين فالحب ليست كلمه تنطقها الشفاه او تكتب على ورقه الحب يملك الف معنى من الجمال والفنون

ماشى بقالى كتير ورجليا تعبتنى بجد ولازم ارتاحلى شويه
بصيت لقيت قهوه فرحت ودخلت وطلبت كمان اللى انا عايزه
قعد ادامى عم سمسم ومعاه راجل شيك اوى ببدلته وجزمته اللى بتلمع
واتقدم الراجل ده ومسح كرسى لعم سمسم واخد بايده واعده فى الكرسى اللى ادامى
قولت اكيد الراجل ده ابن عم سمسم بسم الله ماشاء الله
وشويه لقيت القهوجى بيقول ده عم سمسم يا جدعان وكل اللى فى القهوه قام وقف وبيتحوا عم سمسم ومرحبين بيه اغلى ترحاب
ده مين عم سمسم ده؟
كله وقف ما عدايا منا معرفهوش عادى باه تلاقيه صاحب القهوه
بولع سيجاره فعينى راحت ناحية عم سمسم وابنه
لقيت ابنه نزل على الارض وبيقلع عم سمسم جزمته وبيساله بنوع من الترجى او التمنى انت كده مرتاح يا عم سمسم؟
يعنى كمان مطلعش ابنه
مين الراجل الغامض ده
هوجع دماغى ليه فكك
خلصت سيجارتى وقهوتى وقولت اروح انا باه
لقيت واحد بيبوس عم سمسم ويقوله والله ليك الجنه وجميلك على راسى
قولت اكيد رجل متدين وبيساعد الناس
واحد تانى بيتكلم معاه لقيت عم سمسم ضربه بالقلم على وشه وبيقوله انت خسيس
طب ايه ده ده عم سمسم اتحول
يا جماعه حد يريحنى ويقولى مين ده
ده حتى سواقين التاكسى لما بيشوفوه بينزلوا ويسلموا عليه
ومش بس كده ده كمان الزباين اللى راكبين فى التاكسى عارفينه
يعنى كل الناس يعرفوه وبيحبوه الا انا
خلاص الفضول هيموتنى وندهت للقهوجى وقولتله مين الراجل ده
قالى اللى مع عم سمسم
قولتله مين عم سمسم اصلا وايه حكايته
بصلى القهوجى باستهزاء اوى نظرة واحد متعلم تعليم عالى لواحد جاهل مشفش اولى ابتدائى وقالى بضحكه سخيفه اباه اسال اى عيل صغير بره هيعرفك
بصيت حوليا لقيت شاب من سنى تقريبا فقولت اساله نفس السؤال
مين عم سمسم
وبنفس الابتسامه بس اختلفت عشان جاوبنى وقالى
عم سمسم ده من حكايات زمان
من اشهر فتوات زمان زى اللى بيجوا فى الافلام
كان قوى وصيته مسمع فى كل مكان
يحب الحق وينصر دايما المظلوم
ولو لقى فقير او محتاج من جوه بيته يديه
اجمعت الناس على حبه وشهدوله بالحق والامانه والاخلاص
وجه الوقت اننا نعرف ان عم سمسم مريض بالسرطان ومعدلوش فى الدنيا كتير
والفقر كمان اصابه ومش لاقى حتى تمن الاسبرين
فطبعا كان لازم الناس تساعده بشتى الطرق ماهو ياما ساعدهم
انا كده فهمت ليه الناس حباه وليه بيساعدوه
اللى بينصر الظالم وينشر الحق ويساعد الناس
اكيد كل الدنيا هتعرفه ويحبوه
عشان كده عم سمسم معروف اوى والناس حباه
وانا كمان حبيته من غير مكلمه ولا اتعامل معاه
واخدت سجايرى وولاعتى وتليفونى وبحاسب عشان اسيب القهوه
القهوه اللى مش قادر انساها
القهوه اللى قابلت فيها حجات كتير
قابلت فيها الحب والكره
قابلت فيها الحق والظلم
قابلت فيها الخير والشر
بس الاهم فى كل ده
انى قابلت الراجل اللى دايما بيحقق الحب والحق والخير
انى قابلت عم سمسم

زى اى يوم رايح جامعتى ونادرا لما بعملها ظبطت نفسى واخدت الميكروباص ورايح على الجامعه قعدت جنبى واحده ست من بتوع زمان الجلابيه والشبشب والكلام البسيط الخالى من التزويق وكان ادامنا اتنين بنات اعرفهم معايا فى الجامعه مايا وماهى.مايا بتسالنى انت هتحضر ولا ايه شايفاك جايب ورق قولتلها يا بنتى ده ورق لامنيه اللى كنت عايز اتعرف عليها قالتلى يا بنى قولتلك سكتها صعبه ابعد عنها ردت ماهى وقالتلها محمد هيسلك معاها فكك لقيت الحاجه اللى جنبى بصيتلى باستغراب اوى وبتمصمص ببؤها كده فضحكت وسكت.شويه وماهى جالها تليفون من احمد انتيمها فبتقوله لا يا احمد انت صايع وحرمت العب معاك تانى لقيت الحاجه دى بتقول استغر الله العظيم.انا بصراحه نويت انى اسكت اصلى قلقت من الست دى لتقول كلمه كده او كده بس تليفونى رن ولقيته ميزو صاحبى وبيقولى هنسكور امتى قولتله انا ياعم هبطل عشان امتحناتى لقيت مره واحده الست قالت عندك يا اسطى ونزلت من الميكروباص وهى بتقول استغفر الله وحسبى الله ايه ده دى مصر مبقتش مصر دة بات مصر الجديده

قولت جديده صحيح ومن حقها اصلها قديمه اوى الست دى

روحت الجامعه ومع شلتى قاعدين

افتكرت الست وكلامها وسكت شويه واعدت اتفرج على اللى حوليا

لقيت واحد بيشد شعر صاحبته واللى بيضرب واحده على رجليها واللى بيقول نكت فيها كلام عيب كتير واللى عماله تحط روج وواحد ماسكلها المرايا

ضحكت وقولت صحيح مصر الجديده

فجاه سمعت صوت حد بيزعق قومت لقيته واحد صاحبى بيتخانق فدخلت معاه وبات مشكله وروحنا للعميد

لقيت ناس كتير هناك ولاد وبنات

استنينا كتير لحد مدخلنا للعميد

سال العميد ولد قاله ايه علاقتك بالبنت دى قاله صاحبتى قاله صاحبتك تبوسها من رقبتها فى الحرم الجامعى

وسال بنت تانيه ايه علاقتك بالولد ده قالتله صاحبى قالها صاحبك تنامى على رجليه ادام المدرج

وسال واد وبنت بتشربوا سجاير قالوا لا

قالهو بس بتشربوا حشيش بس وجوا الجامعه

مش ده المهم

المهم انى لقيت الولاد والبنات دول بيدافعوا عن نفسم ومقتنعين انهم فعلا مش غلط

واحد يقول ايوه ابوسها مش صاحبتى ايه الغلط فى كده

والتانى يقول محدش مش بيشرب حشيش

ايه ده هما ازاى فاهمين ان ده صح وازاى مقتنعين

سالنى العميد وقالى وانت

قولتله حضرتك انا ليا كلمه

لما تلاقى الشباب دول بيدافعوا عن نفسهم بصدق وباقتناع كده ومش مصدقين انهم غلط

وتلاقيهم كل يوم يكرروا نفس الغلط ده اكيد فيه حاجه غلط

اكيد فيه سوء تفاهم فى مصر كلها

ليه حضرتك الشاب بيعمل كده مع اى بنت وعن رضى من الطرفين

عشان اكيد مش قادرين يتجوزوا فى الظروف اللى بنعيشها

ليه الشاب بيخدر وبيعمل فى نفسه كده

عشان اكيد مش بيضحك كتير زى مبيضحك وهو شارب

حضرتك انا مش بقولك سامحهم عن كل حاجه وهما مش غلطنين

بس قدر الظروف اللى الشباب بيعيشها

احنا مش طايشين والله

ادونا فرصه كويسه وهتلاقونا والله كويسين اوى

قالى العميد والله كلامك فيه حجات صح ربنا يهديكم انا مش هضيع مستقبلكم اخرجوا

اخرجوا وانتم خليتوا مصر بات حاجه تانيه خاص

قولتله مبقتش حاجه تانيه

دى بقت مصر الجديده

مش عارف اشوف غيرك ولا اتخيل معايا حد الا انتى
تعبان فى حياتى وانتى السبب اصلك دايما انتى حبى
عرفت قيمتك بعد مسيبتك وادينى بدور تانى على قلبى
منين اجيبك واعرف طريقك حد يقولى انا خلاص هموت نفسى
عشت معاكى احلى ايام وخلتينى اعرف ازاى اكون انسان
فيكى الرقه والطيبه والحنيه
واحلى بنت فى الدنيا ممكن تشوفها عنيا
فيكى الامل والحياه اللى خلانى احب الدنيا
وسبتك غصب عنى بسبب ضعفى
ضعفى لما قولتى نتجوز ومش بايدى ولا بخاطرى
قولت يمكن الايام تجمعنا اصله حب حقيقى وربنا هيجازينى
اتارى الايام خاينه وتوهتك عنى وروحتى
قولت احب غيرك اصل الزمن مش هيقف على واحده
كل بنت اشوفها الاقى صورتك ادامى وعيونك اللى سحرانى
واسمع صوتك انتى وبضحكتك اللى دايما كانت عجبانى
اروح لغيرها الاقيكى برضه بتكلمينى وبكلامك الحلو تاخدينى
طب اعمل ايه فى نفسى وقلبى منا بجد مش قادر انساكى
دموعى شافها كل الناس وعرفوا قصتى معاكى
بس انتى بس اللى بتحسى بيا وفينك يا اعز الناس تهونى عليا
فينك تمسحيلى دموعى وبلمسه واحده من ايدك تشفيلى جروحى
محتاجلك والله ونفسى اشوفك او اسمعك
محتاجلك ومحتاج لقلبك وحبك وعمرى تانى مهضيعك

اعد فى بلكونتى كالعاده بشرب قهوتى وسيجاره ابص يمين اشوف زوج وزوجته لسه فى شهر العسل ابص شمال اشوف عيله اعده مع بعضها ابص فى الشارع اشوف عيال بتلعب واللى بتنده على ابنها واللى بينده عى ابنه
خلصت سيجارتى قولت اولع غيرها...يوووه نسيت الولاعه جوه اقوم اجيبها
جيت اقوم ضهرى تعبنى اوى حاولت تانى تعبنى اكتر طب ايه ده انا بقيت مريض مره واحده ولا عشان عندى 51 سنه ايه ده انا عندى 51 سنه مش معقوله دى اول مره اخد بالى من سنى مش مشكله.طب انده على مين يجيبلى ولاعه وانا عايش لوحدى ايه ده دنا عايش لوحدى كمان واول مره اركز فى حاجه زى دى
طب لو مت مين هيحس بيا يا نهار ابيض؟؟؟؟؟؟
ابتديت احس انى بتخنق وابتديت اركز فى موضوع الموت لدرجة انى بجد حسيت انى بموت.انا اللى كنت بروح هنا وهنا ومقضيها بالطول وبالعرض وعايش حياتى اموت لوحدى كده.انا اللى كان ليا اصحاب كتير اوى وعايشها سهرات ومخدرات وحريم يحصلى كده. مقضيها حريم ومعرفتش اتجوزاو بمعنى اصح نسيت اتجوز
اصحابى كلهم اتجوزوا وعندهم اولاد وعايشين فى سعاده وانا ليه كده
واهلى بعدت عنهم وركزت فى شغلى والفلوس والشقه واخرتها هموت لوحدى اهو
عنيا دمعت والخوف اتملك منى انا هقوم انزل الشارع حد يلحقنى
نزلت الشارع ابص يمين وشمال ودمعتى نازله منى ومحدش سائل فيا عندهم حق انا عمرى مكلمت حد فيهم ولا كنت بعمل علاقات مع حد
عايز اصرخ واقول الحقونى انا بموت حد يحس بيا
لقيت حد حط ايده على كتفى وقالى مالك يابنى؟
لقيته شيخ وباين عليه الايمان والتقوى
قولتله انا بموت يا عم الشيخ بموت وهموت لوحدى ومحدش حاسس ولا سائل فيا
قالى استهدى بالله
قولتله انا بموت
قالى صلى على النبى وافتكر ربنا عشان يرضى عليك ويفك خنقتك دى
قولتله انا عمرى مفتكرته يا عم الشيخ تفتكر ربنا هيفتكرنى ويرضى عنى
قالى ربنا كبير
قولتله انا قضيت حياتى كلها تقريبا فى الحرام سواء فى الشغل او بره الشغل او حتى مع الحريم.معملتش حاجه حلوه تخلى ربنا يغفرلى
صعبت على الشيخ اوى وقالى بطل عياط يابنى وحاول تبدا صفحه جديده فى حياتك
قولتله هى فين حياتى
قالى بص حواليك هتلاقى الناس الطيبه كتير
كلمهم اتعرف عليهم هتلاقى اللى بيحبك اكيد
اعمل طيب واتوكل على الله وصلح ماضيك وخلى الحرام يباه حلال
ربنا بيقبل التوبه
شوف بنت الحلال واتجوزها ويكون عندك اولاد واتقى الله فيهم عشان دول هيكونوا هما اللى باقيين ليك ووقت متحس انك تعبان هما اللى هيكونوا حواليك
الحرام عمره موقف جنب اللى بيعمله
لكن الحلال دايما سند اللى بيعمله
سمعت كلام الشيخ لقيت نفسى هديت واستريحت شويه
ابتديت ابص للدنيا بنظره تانيه خالص
عايز ربنا يرضى عنى
هبعد عن الحرام والكره والاذيه وهكون انسان نضيف
رجعت شقتى وحسيت لاول مره برضه انها وحشه اوى
وحشه اوى بكل اللى حصل فيها
وروحت على ايه قرانيه كانت متعلقه عندى وعدلتها وكانت برضه اول مره اشوفها معوجه.ولبست ونزلت رايح لاهلى ومن هناك ممكن ابتدى صفحه جديده فى حياتى زى ما الشيخ قالى وفعلا ربنا غفور رحيم