كفاية انى مصرى


اسف لكل اصحابى واللى بجد وحشونى جدا 
الفتره اللى غبتها عن المدونه كانت غصب عنى فعلا
بس كانت بسبب اللى بيحصل فى البلد والظلم اللى شوفته بعنيا
يمكن يكون سبب تافه بالنسبه لاى حد بس فعلا حسيت ان مصر بتنهار واحده بواحده
مش هطول عليكم
انا كتبت حاجه حسيتها اوى  يمكن تكون وحشه واى كلام بس اهى عبرت عن اللى جوايا شويه

كفاية انى مصرى

زمان كنت بقول كفايه انى مصرى بكل فخر
زمان كنت بقول كفايه انى مصرى فى وش اى جنسيه تانيه
كنت وطنى زى اللى بنشوفهم فى الافلام وبحب مصر جدا ومعنديش اى اعتراض
كنت بعيد عن السياسه لانى كنت مقتنع ان بلدنا صح وحكومتها على السراط المستقيم
ولما حد من اصحابى كان بيتكلم على بلدى وعلى اللى بيحصل فيها كنت بدافع عن مصر باقتناع
ولما كنت بتفرج على الافلام اللى بتبين مصر فى صوره وحشه وحكومتها الظالمه كنت بضايق من الافلام دى اوى
وكانت ماشيه الدنيا وكله تمام  لحد ما الجزائر اهانتنا فى السودان وضربونا وعملوا اللى عملوه
كانت صدمه بالنسبه لكل مصرى واتعصبت وكان نفسى اخد بتارنا
كنت متاكد ان حكومتنا مش هتسكت وبقول اكيد الريس هيجيبلنا حقنا ويرجع كرامة المصريين
كنت حاسس كانى طفل اضرب وجرى على ابوه عشان ياخدله حقه من اللى ضربه
استنيت كتير لحد ما شوفت الريس بيلقى خطاب وقال ان كرامة اى مصرى من كرامة مصر
عجبنى كلامه لانى اصلا معجب بالريس وبسياسته الحكيمه
بس اكتشفت ان فيه سياسه تانيه خالص بتحصل فى مصر
يومين واشعب ينسى
ده فعلا اللى حصل
موضوع الجزائر اخدله يومين وتقريبا الكل نسيه
وعدى الموضوع علينا عادى جدا ولا فى الدماغ
ومشيت الايام طبعا مش هتقف
وعرفت وشوفت الشاب المصرى اللى اتصلب فى لبنان
انا ميهمنيش هو عمل ايه ولا همنى انه كان يتعدم
لانه لو مذنب فلازم ياخد جزاؤه
لكن ليه يتصلب
ليه يعملوا كده فيه
لو كان شاب لبنانى او سورى او سعودى او مهما كانت جنسيته وعملنا احنا كده فيه
هل بلده وحكومته كانت هتسكت؟؟
بيتهيئلى عمر بلده ما كانت هتسيبنا ابدا
احنا سكتنا ومحدش اتكلم كلمه واحده رغم انى قولت اكيد حكومتنا هتاخد موقف لكن للاسف
استخدمت سياستها المعتاده يومين والشعب هينسى
وبالفعل نسينا كلنا
بقيت فى الفتره دى اقول كفايه انى مصرى بس بقولها بكسوف شويه
بقولها وانا فخور بس من جوايا حزين ومحبط عشان مصر مخلتش عندنا كرامه
مخلتش عندنا كرامه ادام اى بلد تانيه
كان نفسى الريس يتكلم فى الوقت ده ويراضى شعبنا على الاقل
لكن سكوته خلانى اتكسر من جوايا واحس ان فيه حاجه غلط
ابتديت اقرأ شويه فى السياسه
ابتديت اسمع واشوف ايه اللى بيجرى حوليا واللى بيحصل فى البلد
ابتديت احس بالظلم الحاصل فينا وفى كل مصرى
مرضتش اتكلم واكتب عن الظلم ده معرفش ليه
يمكن يكون خوف من الحكومه او اى حاجه تانيه
وفضلت ساكت لحد ما جه خالد وموته على ايد الحكومه
اكيد عرفنا خالد من اسكندريه واللى قتلوه الظباط وطلعوا عليه انه كان مدمن وده سبب وفاته
اكيد حسينا بالظلم وبالجبروت فى الوقت ده
اتكلمت وكتبت عن الظلم وخرجت فى المظاهره مع الشباب والبنات
علينا صوتنا عشان حد يسمعنا
علينا صوتنا عشان حد يحس بينا
علينا صوتنا عشان ربنا يرفع الظلم ويحقق العدل
بس ملقناش غير معاملة الحكومه اللى كانت بتضرب فينا وتعتقل مننا شباب وبنات
ووصل الضرب كمان لحد البنات مش لينا كرجاله بس
وعدى يوم واتنين ومفيش اى تقدم ولا اى تغيير
طيب ايه اللى بيحصل فيكى يا مصر؟
حرام ولا حلال ده؟
الظلم باين اوى ومفيش حد قادر ينصرنا ليه
فى الايام دى بكيت وبكيت كتير على اللى بيحصل وعلى اللى شوفته بعنيا
فى الايام دى متكسفتش ان اى بلد تانيه تشوف اللى بيحصل عندنا فى مصر
بالعكس
اتمنيت ان كل الدول تشوف الظلم بتاع حكومتنا يمكن هما اللى ينصرونا
مفيش امل
كلمه قولتها كتير ومن جوا قلبى
والخوف والرعب اللى عيشناه سواء من الحكومه او من سكوتك يا ريس
يا ترى انت عارف باللى بيحصل فى مصر؟
يا ترى لو عرفت هتشيل الظلم ده؟
فى الوقت ده اللى كلنا بنقول يا رب ارحمنا
لقيت نفسى بقول كفايه انى مصرى
بس المره دى فيها فرق كبير اوى
لانى بقولها المره دى وانا مظلوم
بقول كفايه مشاكل وظلم مش كفايه انى مصرى كمان هتظلمونا
اصبحت انى مصرى كلمة زى شتيمه او اهانه
اتمنيت انى اكون من اى بلد تانيه عشان مكنتش اشوف كل اللى حصل
بس يا ترى فيه امل؟؟
يا ترى هييجى اليوم اللى هنشوف مصر بلد عادله ومفيش فيها ظلم؟
يا ترى خالد وكل شاب اتعمل فيه اى حاجه من حكومتنا هياخده حقهم؟؟
اسئله محيرة وبتحسسنى بالاحباط كتير
لكن بقول يا رب كفايه وحقق لينا تغيير يخلينا كويسين


16 Response to "كفاية انى مصرى"

  1. العلم نور says:
    17 يونيو 2010 في 7:59 م

    رحمه الله وأسكنه فسيح جناته .. آمين وحسبنا الله ونعم الوكيل.

    اصحى يا نايم ووحد الدايم ..

    (حملة الجسد الواحد)

    أرجوا من المدونين الموقرين أن يضعوا شعار الحملة واسمها في الشريط الجانبي لمدوناتهم كدلالة على وحدة صف أمة محمد

    لمزيد من المعلومات

    http://dndanh111.blogspot.com

    جعله الله في ميزان حسناتكم .. آمين

  2. غير معرف Says:
    18 يونيو 2010 في 2:24 ص

    السلام عليكم
    صباح الخير
    عودا حميدا والحمد لله قرارك مطولش اكتر من كدا

    نورت مدونتك

    بس مع الاسف رجعت وفى قلبك حزن واسفا على مصر
    وعلى اللى بيحصل فيها من ظلم وحاجات كتير تانيه بتحصل
    صوت الحق بيروح ...... مع صرخة شعب مظلوم
    وحسبى الله ونعم الوكيل ولا حولا ولا قوة الا بالله العلى العظيم
    ربنا يرحمنا برحمته
    مصر جميله لكن ......

    تحياتى

  3. غير معرف Says:
    18 يونيو 2010 في 2:26 ص

    شعب مذلول واهانه وضرب وهموم

  4. داليـ ـ ـ ـ ـ ـ ــــا says:
    18 يونيو 2010 في 5:11 ص

    بص شوف انتا قلت ايه
    قلت اننا اتهانا فى الجزائر
    طيب قلنى معلشى ومتاخدش حقنا
    قلت شاب اتهان وهان كل الشعب فى لبنان
    وبردوا
    اللى اكتر اهانه من ده كله بقه يالفندم
    خالد اللى انضرب واتعذب واتهان ومات من اهل بلده
    حاسسها دى اهل بلده
    مصرين زيه
    والله مش عارفه اقلك ايه
    يبقا كده منلموش على الجزائر وعلى ع لبنان
    لان الشعب المصرى اهوه بياكل فى بعضه اكل
    والنبى دى حاجه تعر وتكسف
    وتقلى مصرى
    ملعون ابو مصر فى الارض اللى تدوس على شبابها كده
    ومتعملش ليهم كرامه ولا كبرياء
    لما احنا نكون فى بلدنا ومش معمولنا كرامه نروح اى بلد سياتك عشان يتعملنا كرامه
    فعلا حاجه تعرررر

    السؤال الاول
    لا عمرك ما هتشوف مصر زى مانتا بتتخيل كده خلاص الفاتحه على كل شيئ ولا الضالين أمين

    السؤال التانى
    خالد بقه واى شاب زى ما بتقول هياخد حقه بس مش فى الدنيا فى الاخره بإذن الله
    فى يوم رد المظالم
    ربنا هيجيب له حقه

  5. داليـ ـ ـ ـ ـ ـ ــــا says:
    18 يونيو 2010 في 5:22 ص

    بص انا لما قرئت الموضوع انهارت بصراحه واتفاعلت معاه
    ومينفعش انى ادخل ارحب واسلم لانى لو كنت عملت كده كان هيروح انفعالى بقرأءة الكلام

    انا بقه جايه ببارك واقول
    الف الف الف الف حمدلله على السلامه ياأستاذ محمد
    منور مدونتك من جديد ومنور عالم التدوين كله
    وبلاش القرارات الصعبه دى تانى

    لاء وايه راجعلنا بموضوع جامد جامد
    شكل الفتره اللى غبتها دى عملت معاك حاجه جامده

    الف حمد لله على سلامتك
    ومنور مدونتك

  6. داليـ ـ ـ ـ ـ ـ ــــا says:
    18 يونيو 2010 في 5:31 ص

    بص انا لما قرئت الموضوع انهارت بصراحه واتفاعلت معاه
    ومينفعش انى ادخل ارحب واسلم لانى لو كنت عملت كده كان هيروح انفعالى بقرأءة الكلام

    انا بقه جايه ببارك واقول
    الف الف الف الف حمدلله على السلامه ياأستاذ محمد
    منور مدونتك من جديد ومنور عالم التدوين كله
    وبلاش القرارات الصعبه دى تانى

    لاء وايه راجعلنا بموضوع جامد جامد
    شكل الفتره اللى غبتها دى عملت معاك حاجه جامده

    الف حمد لله على سلامتك
    ومنور مدونتك

  7. ساسو says:
    19 يونيو 2010 في 12:22 ص

    حمدالله علي سلامتك
    نورت المدونه من جديد
    بجد مش عارفه اقول ايه علي الموضوع دا
    لأني بجد من كتر الظلم اللي حاصلنا بقيت مصدومه وزي ما قولت مكسوره وبجد مش عارفه الحال هيوصل بينا لفين

    سامحني لأني بجد بتأثر جدا بالكلام دا
    وبجد حاسه اني مخنوقه جدا
    ومش عارفه اتكلم

  8. just waiting says:
    19 يونيو 2010 في 2:24 م

    ايه المفاجئة الحلوة دي يا محمد
    نورت بلوجر من تاني
    ان غدا لناظره قريب ربنا على المفتري والظالم يمهل ولا يهمل هناخد حقنا هناخده لو مش في الدنيا يبقى يوم القيامة

  9. أتنين حبيبين says:
    25 يونيو 2010 في 12:07 م

    حسبى الله وانت الوكيل يارب

  10. ساسو says:
    3 يوليو 2010 في 12:03 ص

    ايه يا صديقي غبت تاني ليه بس
    ونسيت اصحابك ليه
    ياريت تكون بخير

  11. اسيره الاحزان says:
    28 يوليو 2010 في 5:41 م

    انا بقيت بكره البلد دى من كتر القرف اللى بنشوفه فيها واللى بيعملوه فينا والحكومه الفاسده وجتهم القرف

    والله انا عايزه اسيب البلد دى واهاجر لبلد انضف الواحد ياخد حقه فيها

    حسبى الله ونعم الوكيل

  12. ساسو says:
    18 أغسطس 2010 في 4:00 ص

    كل سنه وانت بخير
    ورمضان كريم

  13. داليـ ـ ـ ـ ـ ـ ــــا says:
    20 أغسطس 2010 في 11:25 م

    كل سنه وانت طيب ياأستاذ محمد
    رمضان كريم


    انتا كنت داخل تقول الكلمتين دول
    وتدينا ظهرك

    طيب ماشى

  14. طوبه فضه وطوبه دهب says:
    10 سبتمبر 2010 في 3:43 ص

    كل سنه وانت بالف خير وصحه وسعاده

  15. ساسو says:
    24 نوفمبر 2011 في 9:47 ص

    فينك يا صديقي
    يارب تكون بخير
    طمني عليك

  16. entrümpelung wien says:
    26 سبتمبر 2012 في 2:06 ص

    شكرا لكم .. دائما موفقيين ..))
    entrümpelung
    entrümpelung wien

إرسال تعليق