حلم شاب مصرى


زى كل يوم اروح من على القهوه اللى بقضى عليها معظم وقتى وافضل شويه على النت وشويه مع قلمى
اكتب عن اصحابى عن الدنيا واللى بيحصل فيها
بس جه يوم وروحت بدرى ونمت كمان بدرى
وحلمت حلم او كابوس مش عارف تفسيره
لقيت نفسى مره واحده رئيس الجمهويه
ايوه لقيت نفسى رئيس مصر كلها
كنت فرحان ومبسوط منا الراس الكبيره دلوقتى
وابتديت امارس المريسه
واشخط وادى اوامر وبدون نقاش
وكانت اوامر بيتهيالى عجبت الشعب كله مع ان حصل ضدى مؤامرات وقتها
كان اول امر ليا انى ارجع شباب مصر المغتربين
مسبتش اى شاب عايش فى الغربه بالعكس رجعت كل الشباب واديت لكل شاب فرصة عمل
ابتديت افتكر الناس الغلبانه واقدم ليهم المساعدات واللى هما محتاجينه
فكرت فى البنت اللى نفسها تتجوز بس مش قادره تجهز نفسها وجهزتها
وبرضه بالنسبه للشباب وفرتلهم السكن
عملت التجنيد اختيارى مش اجبارى
ورفعت راتب المتطوع للجيش
حسنت التعليم واهتميت بيه بنفسى
درست مواهب الناس واديتلهم فرصه عشان ينموا المواهب دى
عملت كرامه للمصريين فى الخارج ورديت وهددت اى بلد بتهين مصر
دعمت الموارد الاساسيه للمعيشه تدعيم كامل
وعملت وزاره خاصه لمشاكل الناس عشان تسمع منهم وتفيدهم
نزلت الاسعار شويه ورفعت من رواتب الموظفين
لفيت على اقسام مصر قسم قسم عشان اتاكد انه مفيش ظلم بيحصل
خليت الظابط زى المواطن العادى مش زى زمان كانه مخلوق سوبر
حطمت قاعدة الاحتكار فى بلدنا وفككت اتحاد مراكز القوى
لقيت ان مصر بات كويسه بشبابها وناسها اللى اصبحوا بيحبوها وعايزين يعيشوا جواها
ولسه بفكر فى مشاكل تانيه عشان احلها لقيت نفسى فوق سريرى وكنت بحلم
حلم جميل وبعيد ومستحيل
حلم قضيت فيه اجمل لحظات بس مش عشان كنت الريس لا
عشان الناس اللى كانت مبسوطه وعايشين سعده
عشان الشباب اللى اصبحوا متفائلين وبيشتغلوا جوه بلدهم مش عايزين يهاجروا
عشان الغلابه والمظلومين اللى اخيرا ربنا ادالهم حقهم ونصرهم
عشان اخيرا باه فيه تغييير من ايام السادات المحبوب من كل الشعب ومحدش كرهه
عشان الامل والنور اللى ظهر للناس وخلاهم يعيشوا بجد من جديد
ندمت انى صحيت من الحلم ده
بس مش عارف ده حلم ولا كابوس
حلم عشان هو حلم بجد وصعب يتحقق
وكابوس عشان صحيت منه على الواقع المر
بس كفايه انى عيشتلى لحظات حلوه وشوفت مصر زى منا عايزها

19 Response to "حلم شاب مصرى"

  1. داليـ ـ ـ ـ ـ ـ ــــا says:
    14 مايو 2010 في 7:15 ص

    هههههههههههههههه

    وربنا تجنن
    الريس مره واحده
    هههههههههههه
    هقلك انا احلا ما فى الحلم انك انسان نادر فى الزمن ده بجد لان حلمك كله هدفك منه اسعاد الاخرين مفكرتش فى نفسك خالص والوفاء ده صعب تلاقيه فى حد من الزمن ده عشان كده بقلك انتا انسان من الزمن الاخر

    تحياتى يامجرد إنسان

  2. مجرد انسان says:
    14 مايو 2010 في 4:49 م

    داليا
    والله انتى زى العسل على كلامك ده
    وبعدين ايه المشكله لما اكون الريس
    على الاقل انا صغير فى السن شويه هههههه
    ربنا يخليكى يا داليا على كلامك الرقيق ده ومتحرمش من تعيقاتك اللى دايما مشجعانى وبتدينى دفعه

  3. مهموهة أحمد says:
    15 مايو 2010 في 4:54 ص

    محمد و الله يا محمد حلم جميل اوووووووووووووووووي
    مش لانك الريس فعلا
    لا لان مصر بقت احلى و احلى مكان في العالم
    الكلام اللي قلته ده عمالة اقول عليه يا ريت يا ريت يا ريت

    بجد كلام حلو اوي اوي و الله

    يا ريت كصر تبقى كده
    يا رب ما يكونش حلم
    مش لازم يا عم تبقى الريس
    بس المهم مصر تتغير فعلا للاحسن ده

    لو بقيت الريس
    يا ريت تفتكرني و تمسكني وزارة
    ان شاء الله حتى وزارة الاسكان
    اصل نفسي بجد ما الاقيش حد نايم في الشارع
    و لا عشوائيات
    و لا ناس نايمة في علب سردين من الصفيح
    و لا ناس عايشة في عشش مليانة فيران و تعابين و عقارب

    بجد بجد نفسي في الوزارة دي

    ربنا يخليك يا محمد يا رب
    بجد عيشتنا معاك لحظات حلوة اوي اوي
    خالص تحياتي و تقديري

  4. مجرد انسان says:
    15 مايو 2010 في 8:19 ص

    مها يا احلى مهموهه
    عايزك متقلقيش انا لو بقيت الريس هخليكى نايبة الريس بس مش نايبه نايبه يعنى لالالا اقصد نائبة الرئيس واديكى صلاحيه انك تعملى كل اللى عايزاه
    لانك قولتى كلام وحجات لازم تتعمل عشان بجد تخلى مصر بلد كويسه وفيها عدل
    انتى طيبه اوى يا مها بكلامك وامنياتك دى
    وعلى فكره ليكى وحشه كبيره اوى ووحشنى الكلام معاكى والله
    بس اقول ايه
    تحياتى ليكى من كل قلبى يا مهموهه

  5. just waiting says:
    15 مايو 2010 في 1:22 م

    صباح الفل يامحمد صح النوم
    حلم رائع يارب يتحققلك في يوم واناان شاء الله هنتخبك بشرط تهد جامعة المنصورة وتفضي المعتقلات وتحبس فيها كل الدكاترة المفتريين وتسيبني انا اعذبهم

  6. باحث عن حب says:
    15 مايو 2010 في 4:45 م

    منحقك تحلم
    ومن حقهم مصادره الحلم
    كان حلم ابوا اوباما
    فحققه الابن
    بس احنا
    الاحلام
    على طول كلابوش خايف عليك
    منه
    بس ماتخاف يابنى
    مش هخبص عليك
    هخهخهخهخ
    الغربه
    والله ما فى شاب الا
    وحلمه السفر
    او الهجره
    والبلد
    مفيهاش
    عقول
    او قلوب
    موضوع جميل استأذنك
    فى اضافه مدونتك
    فى مدونتى المتواضعه
    دمت بعز

  7. مجرد انسان says:
    15 مايو 2010 في 4:52 م

    صباح الفل يا صباح الفل
    طبعا عرفتى قصدى على مين
    فى الاول حمدلى على السلامه بعد الغياب عنا
    ثانيا متقلقيش
    اول حاجه نفسى اعملها هدمر جامعة المنصورة خالص وكله يتخرج مش ينجح
    وعلى فكره ممكن اعتقلك انتى كمان بدل متقتلينا منا عارفك شرسه ههههههه
    ليكى وحشه والله

  8. مجرد انسان says:
    15 مايو 2010 في 4:54 م

    باحث عن حب
    اكيد لازم نحلم لان الاحلام مش بفلوس ولا حرام وطالما الواقع اصبح مستحيل يباه لازم نحلم
    واكيد تقدر تضيف مدونتى وده شرف ليا
    تحياتى الغاليه

  9. ليله شتاء says:
    16 مايو 2010 في 3:13 ص

    السلام عليكم
    الله على أحلام مجرد أنسان عايز يتاعمل كأنسان
    فى بلده وعايز كل اللى له احلام تبقى حقيقة وليس خيال !!!!!

  10. غير معرف Says:
    16 مايو 2010 في 5:15 ص

    مبررروك ياريس

    أنا رايحه أصوت

    هنتخبك بس بشرط

    تعمل وزاره جديده وتسميها وزارة السيدات المغلوب على أمرها ...
    وتعينى وزيره
    ههههه

    بجد ياريت الحلم يتحول لحقيقه والكابوس ينتهى

    حلم رائع من شاب مصرى

    لك كل الاحترام والتقدير

  11. مجرد انسان says:
    16 مايو 2010 في 9:50 م

    ليلة شتاء
    ربنا يخليكى على كلامك الحلو واللى دايما بيعجب كل الناس مش لوحدى
    ودعواتك معانا ان كل احلامنا تبقى حقيقه مش مجرد حلم وبس
    تحياتى ليكى

  12. مجرد انسان says:
    16 مايو 2010 في 9:52 م

    الحب الجميل
    انا موافق اكيد على طلبك وهخليكى كمان وزيرة الوزاره دى بس اياك متعمليش زى الوزرا بتوع اليومين دول هههههه
    يا رب فعلا الحلم يتحقق والكابوس يتشال زى مقولتى لان مصر بجد محتاجه تغيير او حلم بمعنى اصح
    تحياتى ليكى واشكرك على كلامك

  13. saragebaly says:
    18 مايو 2010 في 7:04 ص

    يبدو أننا مش هنشوف مصر زي ما عايزيين نشوفها إلى في أرض الأحلام وبس

    إنما في الواقع .. بيفضل كابوس الحقيقة ملاحقنا


    حلم جميل

    كلنا نتمنى أن نتذوقه واقعـاً

    تحيااتي

    سارة

  14. مجرد انسان says:
    18 مايو 2010 في 6:16 م

    saragebaly
    متشكر ليكى يا ساره على مرورك
    بس تفائلى ان شاء الله كله يكون احسن وربنا يخلى بلدنا احسن بلد
    وطول مابيحصل تغيير صح اكيد فيه تحسن
    تحياتى ليكى وعلى مرورك الكريم

  15. BNT ELISLAM says:
    19 مايو 2010 في 7:40 ص

    عارف احلى حاجه ايه
    انك قدرت تحلم

    وتتخيل معنى كده ان لسه فى امل وانه موجود

    بس كلام جميل وياريت يكون حقيقه

  16. مجرد انسان says:
    19 مايو 2010 في 4:52 م

    BNT ELISLAM
    اكيد لسه فيه امل ومتقلقيش ان شاء الله الحلم بتاعنا كلنا هيتحقق
    شكرا لمرورك

  17. sweet angel says:
    22 مايو 2010 في 11:10 م

    لا ياعم احنا ناس بتحلم على ادها

  18. مجرد انسان says:
    23 مايو 2010 في 5:22 م

    sweet angel
    حتى الحلم كمان بلاش ده يباه كتير
    احلمى ماهى الاحلام ببلاش
    وطول ما بنحلم اكيد فيه امل
    شكرا لمرورك ويدوم الود

  19. entrümpelung wien says:
    26 سبتمبر 2012 في 2:07 ص

    شكرا لكم .. دائما موفقيين ..))
    entrümpelung
    entrümpelung wien

إرسال تعليق