عالم بينهار داخل القطار


كل الناس جربوا سفر القطر فيه اللى حبه واللى كرهه واللى حس وشاف حقيقة القطر
انا واحد من الناس جربته وحسيت وشوفت بالعالم التانى اللى جواه
بس كان عالم مختلف عن عالمنا شويه
عالمنا فيه اللى بيضحك ومبسوط وبرضه فيه الحزين والكئيب
لكن جوه القطر كان عالم كله حزين فيه الدموع والسرحان اللى شبه الغروب
فيه الست العجوزه اللى بتجرى على معاش جوزها مش عارفه تصرفه ومفيش حد يساندها
فيه البنت المسافره بعيد عشان تتعلم وتدرس وترجع لاهلها بشهاده
فيه الشاب اللى رايح جيشه غصب عنه وسايب وراه مسئوليات كتيره
فيه المجرم الهربان وجوه الناس بيدارى من العيون
فيه اللى هربان من اهله وتعيس فى حياته ومش عارف فين يكون طريقه
فيه العيله الكامله اللى نقلت حياتها وره الشغل ومش باديها تختار مصيرها
فيه الام اللى بتبكى راحه تشوف ابنها للمره الاخيره قبل دفنه
فيه الحزن بالكيلو ولو قادر اوزن وشيل واتوكل على الله
حتى سواق القطر بتلاقيه حزين وساكت وساحب وراه عالم تايه
بس مش بايده ده قطر ومحدش بيوقفه الا بمزاجه
عشت جوه القطر العالم ده وحسيت بكل اللى فيه وجت محطتى ولازم انزل
نزلت وفضلت باصص على العالم المتحرك ده
باصص عليه وبفكر فى الناس اللى جواه فين تكون محطتهم
ولما ينزلوا محطتهم برضه هيفضل القطر ماشى ويركب ناس غيرهم ويرجع العالم ده زى مكان
رجعت للعالم بتاعى وعايز اشوف ناس فرحانه بجد عشان انسى اللى جوه القطر
عشان انسى كل بصه حزينه شوفتها من حد
عشان انسى كل دمعه من ام او بنت او اى حد
بس زى مقولت عالمنا فيه الحزن والفرح ودايما يجى الحزن الاول
بس جوه القطر حزن تانى وياس وجرح شكلهم مختلف
واللى جرب وحس اكيد هيقول انت صح

17 Response to "عالم بينهار داخل القطار"

  1. داليـ ـ ـ ـ ـ ـ ــــا says:
    6 مايو، 2010 10:53 ص

    وانا بقلك انتا صح

    تعرف انا حاولت اركب القطار بس من باب الفضول
    كنت بروح كليتى فى طنطا وطبعا معايا زملائى الا مشتركين فى الباص والا مشتركين فى القطار والا مقضيانها مواصلات مكروباصات زى حالات

    روحت كم مره من الكليه مع شله الا هما مشتركين فى القطار وشفت ان كل الا بيركبوا القطار ده ناس بسيطه وزى ما قلت فيه متاهات من الحياه

    صحيح حبيته وحبيت ركوبه بس كان ركوبه ليا بمتل زياره وكنت ببقا سعيده جدا

    وفى الاخر هقلك انتا اتكلمت عن القطار مش عربيه ملاكى احدث موديل ولا طياره يعنى اكيد اكيد هيكون جوا القطار الناس الحزينه دى

    تحيه ليك
    ولنظرتك الحلوه للحياه
    واحساسك اللى لاحظ ده

  2. باحث عن حب says:
    6 مايو، 2010 5:14 م

    القطر ده
    هو الدنيا اللى عايشين فيها
    بس مش بنحس بالوقت اللى بنقضيه فى القطر
    الا لما ننزل
    ده اللى بيحب القطر
    وفى ناس حريصين على الوقت حتى ولو هما فى القطر بصحيح
    وعلى فكره العالم بينهار
    جو وبره القطر
    شكرا لك

  3. مجرد انسان says:
    6 مايو، 2010 5:58 م

    داليا
    بجد مش عارف اقولك ايه انا حسيت انك عشتى القصه اللى عشتها جوه القطر وشوفتى العالم اللى جواه
    ليكى منى مليون تحيه وكل احترام وتقدير

  4. مجرد انسان says:
    6 مايو، 2010 6:00 م

    باحث عن حب
    تفسيرك فى محله وواقعى اكيد
    شكرا على مرورك الكريم وان شاء الله تكررها

  5. إمرأه من ثلج says:
    7 مايو، 2010 3:10 ص

    اول صباح الفل
    جمعة مباركة

    سعيدة جدا بزيارتك ليا فى مدونتى ودى مش رد الزيارة لان ان شاء اللة يكون فى تواصل دائم

    القطر دا ذى الحياة فى الحزن والفرح وبردة زى ماهوا بيقف فى محطات ويرجع يكمل هيا كدة الحياة

    تحياتى لاسلوبك المتميز

    ويدوم التواصل

  6. إمرأه من ثلج says:
    7 مايو، 2010 3:11 ص

    نسيت اقول ممكن تسمحلى اضيف مدونتك فى مدونتى التواضعة

    شكرا

  7. مجرد انسان says:
    7 مايو، 2010 5:13 ص

    امراه من ثلج
    صباح الفل والياسمين على عيونك
    انا اللى بشكرك على مدونتك الجميله جدا لانها بجد اكتر من رائعه وبشكرك جدا على مرورك اللى اكيد هيتكرر لانى برضه مش هقوم من على مدونتك
    اما عن اضافة مدونتى عندك فانا ضفت مدونتك اصلا عندى يعنى اكيد مفيش مشكله

  8. BNT ELISLAM says:
    7 مايو، 2010 7:18 ص

    عندك حق وفعلا انت صح
    عالم غريب من يدخل فيه دكانه فى دوامه لايعرف عنى الخروج منها

    المهم احنا نفكر ازاى نتعامل مع ظروف القطر ده

    ونحاول نتكيف معاه ومع العالم الى جوه

  9. Just waiting says:
    7 مايو، 2010 11:39 ص

    القطر
    تعرف انا نفسي قوي اركب قطر بس عمري ما ركبته
    لكن دايما بحس ان القطر دا عامل زي حياتنا محطات وكل محطه بنستنى المحطة الجاية لحد ما نوصل لمحطة معينة نتمنى لو نرجع تاني بس للاسف ماينفعش وزي ما قولت دا قطر محدش بيوقفه بمزاجه
    لحد مابنوصل للمحطة الاخيرة في حياتنا ونضطر ننزل ونسيب العالم كله
    كلامك حلو اوي يامحمد ربنا يوفقك

  10. مجرد انسان says:
    7 مايو، 2010 4:48 م

    بنت الاسلام
    شكرا على مرورك الكريم
    وزى ما قولتى عالم غريب المهم اللى يفهمه

  11. مجرد انسان says:
    7 مايو، 2010 5:12 م

    just waiting
    انا متاكد يا نهى انك لو ركبتى القطر هتلاحظى كل اللى حكيت عنه
    بجد عالم تانى وغريب
    وتفسيرك اكيد فى محله بس يا رب المحطه الاخيره تكون كويسه وسهله

  12. مهموهـــــــة says:
    8 مايو، 2010 12:32 م

    محمد يا محمد
    و الله غصب عني و الله
    اصل ايام الويك اند مش بكون في البيت
    اتاخرت غصب عني و الله

    عموما انا عجبني البوست ده موت موت موت موت و الله
    حسيت بكلام حلو اوي
    خليتني افتكر المشاهد اللي الواحد بيشوفها في الافلام
    فعلا كل اللي قلت عليهم دول ساكنين عالم القطر
    فعلا و الله
    اصل لو معاهم فلوس ما كانوش ركبوا القطر من اصله

    ااااااااااه وجعت قلبي و الله يا محمد
    بس بجد و الله بوست رائع
    يمكن في يوم اكتب عنه
    بس اكيد هكتب انك الملهم بالفكرة
    يا صاحب احلى الافكار

    خالص تحياتي و تقديري

  13. مهموهـــــــة says:
    8 مايو، 2010 12:34 م

    اه صحيح افتكرت حاجة نسيت اقولها


    القطر ده انا بشبه بالحياة

    كل الناس ركباها

    و هييجي اليوم لكل واحد اللي ينزل محطته عن الحياة و يروح لرب العالمين

    كل واحد و ليه محطته
    بعنوان
    بمكان
    بزمان
    ما يعرفوش غير رب العالمين

    ربنا يرحمنا يا رب

  14. مجرد انسان says:
    8 مايو، 2010 5:48 م

    مهموهة
    والله كلامك وحشنى جدااااااااااااا
    وكنت فعلا زعلان بسبب غيابك ده بس يا رب تكونى قضيتى ويك اند جاااامد عشان انتى بجد تستاهلى كل خير
    اما عن كلامك على البوست ده فانتى بجد احرجتينى من كلامك الحلو ويا رب دايما اكون عند حسن ظنك
    ولازم تعملى موضوع فعلا عن القطر لانى متاكد انه هيطلع منك احسن بكتير وطبعا هتفتكرينى فيه يا مهموه
    بس ميوجعش قلبك اكيد سلامة قلبك من الوجع
    بجد انا بشكرك جدا على كلامك الحلو وبتمنالك من قلبى كل خير

  15. well says:
    9 مايو، 2010 7:13 م

    يااااااااا دانت باين عليك كل يوم بتركب القطر ..

    القطر مليان وشوش ناس وكل واحد له قصة وحياة
    عارف ..الدنيا دى زى القطر وكل واحد له محطة بينزل فيها
    بس الفرق بين القطر العادى وقطر الدنيا ان القطر العادى بتكون عارف انت نازل فين
    اما قطر الدنيا ..بتلقيه وقف مرة واحدة ويقولك انزل
    تحياتى لمشاعرك

  16. مجرد انسان says:
    10 مايو، 2010 6:49 ص

    well
    والله ابدا انا مركبتوش غير هى مره واحده بس فى حياتى وحسيت باللى كتبته ده
    شكرا على مرورك

  17. umzug says:
    24 فبراير، 2013 1:46 ص

    Thanks to topic

إرسال تعليق