حظى

حظى معاكى يا دنيا غريب
دايما بتكسرينى وتهزمينى وتبعدينى عن اى حبيب
اقول ماشى بكره تتعدل وادى الايام بتعدى
اتاريكى مش سايبانى ودايما ويايا زى القريب
ظلم وكره وحيره وانانيه شوفتهم معاكى
ولا بتكلم وراضى بس عمرى ما كنت ليكى صديق
عودتينى انى مشتكيش ومقولش ابدا لا
والالم والوجع دايما عندك ليهم معنى ادق
فاكرانى دايما بالحزن والوحده والهموم
ونسيانى فى الفرح والابتسامه كمان خلتيها غيوم
عملت ذنوب وبعترف وادام ربنا بتوب
ومين عالم يمكن يغفرلى علام الغيوب
بس انتى حالفه متغفريلى ووياكى تعزبينى
وتدينى فى جرح ورا جرح وبتموتينى
استغفر الله لو اللى قولته حرام
بس حرام اللى بيتعمل فيا ومليون حرام
ونفسى ترحمينى يا دنيا وتسيبينى اعيش
سيبينى احس فى مره انى بجد انسان

عايش

عايش احلى عيشه وماشى الحال زى الفل
كل حاجه بطلوبها بلاقيها ومعنديش حاجه فى حياتى تعل
فلوس وعربيه وفسح وخروجات واحلى دماغ
عايز ايه تانى من الدنيا طبعا اكيد مفيش
شقتى فى احلى مكان وعايش لوحدى كمان
بعمل انا واصحابى كل اللى عايزينه واكتر بمراحل
سكر وحريم وسهر للصبح ولا بتفرق معانا الايام
ايام مين واحنا على طول مخدرين ومش واعيين
معرفش اعيش من غير سهر ومخدراتى كمان
اصل فى نظرى دى حياتى عايز اعيشها ولو حتى اوهام
جيت فى سهره من سهراتى واصحابى روحوا بدرى
سابولى مخدرات وميه تكفى بدل الشله شلتين
قولت اظبط نفسى ومع نفسى هعيش
شربت سيجاره لقيت الدماغ حلوه قولت اديها كمان
اديتها كمان سيجارتين
ابتديت احس انى بضيع
قولت حلو اديها كمان
وفجاه لقيت نفسى مش شايف ادامى وحسيت ان فيه حاجه غريبه
قولت اقوم من مكانى ولسه بقوم اعدت تانى مكانى غصب عنى مش قادر
ولقيت ضربات قلبى سريعه جدا جدا وابتدت من قوتها توجع صدرى
ولقيت ريقى ناشف زى الحجر ومش عارف حتى اتكلم
فيه ايه انا مالى
حاولت اقوم تانى عايز اشرب برضه دايخ ومش قادر
جيت امسك تليفونى اتصل بحد اديا مقدرتش تمسك بالتليفون
جيت انده او ازعق حد يلحقنى محدش سمعنى لان صوتى واطى جدا
عرفت ان هى دى اخرتها وروحى بتطلع
قولت يارب
يا رب
يارب متخلنيش اموت كده
خلينى اموت وانا نضيف ومكونش وحش اوى كده
وفكرت فى كل حاجه وحشه عملتها لقيت كل حياتى كانت غلط
قولت يا رب
يا رب قومنى لو يوم يمكن اقدر اصلح من اخطائى واكون كويس
يا رب انا هبطل مخدرات وهبعد عن الحرام وهرجع اليك بس قومنى
ومره واحده محستش بنفسى
لقيت نفسى صاحى فى اوضه وحوليا امى وبتقرا قران وعماله تدعيلى وهى بتبكى
قولتلها انا فين
عرفت انى فى المستشفى
وعرفت انى نجيت من الاوفر دوس او الجرعه الزياده اللى هى الموت وكان ده معجزه
وهى بتحكيلى بكيت معاها على حياتى اللى ضيعتها فى الغلط والحرام
وزعلت على مشيى مع اصحاب ملقتهومش جنبى ولا كلمونى فى التليفون
وقررت انى اكون واحد تانى
قررت انى اكون كويس وارجع الى الله ارجع للصح

موقف وضحكه فى الاخر

اعدين على الكافتريا كالعاده بالليل ونفس البنت رايحه جايه علينا
هى بصرحه جميله كلها على بعضها بنت زى القمر
كل يوم تلاقيها معديه على الكافتريا وتفضل تتامل فى كل شاب اعد
وكل شاب يفضل يتامل فيها جامد سواء راحه او جايه لان كده حلو وكده احلى
ويا سلام على دلعها وضحكتها وكلامها اللى بيسمع الدنيا كلها
المهم بصيت لقيت حد غريب معرفهوش اعد جنبى قولت مش مشكله عادى
شويه وصاحبتنا الدلوعه دى فاتت وكالعاده بتتدلع وتتامل الوجوه
فجاه لقيت الغريب اللى جنبى ده بيقولى هو ايه النظام البت دى عايزه ايه يا برنس
ضحكت صراحه وقولتله صباح الفل يعنى دى بنت من المنطقه
قالى لا اصل انا اعرفهم من وسط مليون البت دى ليها فى اللون
ليها فى اللون دى مع تعبيرات وشه كان وقتها المليجى بالظبط فى دور الصايع
قولتله عيش مع نفسك
المهم خلاها فايته تانى وراحلها بكباية الشاى
وطبعا كل اللى على الكافتريا راميين عيونهم وودانهم معاه
قالها ايه يا جميل مش هتيجى باه
البت بصتله باستغراب وسابته ومشيت
رجعلى قالى مش قولتلك يا برنس انها من اياهم
قولتله تمام استمر
قالى انت ياعم مش مصدقنى وحاسس انك بتتنك عليا
قولت والله ابدا اصلى بس بتعلم منك
قالى شويه كده وهتلاقيها راجعه وهنطلع احلى طلعه انا وهى
فات ساعه وهو راشق جنبى وعمانى سجاير وتعبت من كتر شربه الشاى
وفجاه لقيت البت رجعت ومبتسمه اوى
قولت الواد ده طلع صح ولا ايه ولسه مكملتش قالى مش قولتلك اتعلم باه
والاخ قام وقف ومره واحده ظهر واحد مع البنت دى تقريبا طول لعيبة السله كده بس اعرض واضخم
ومسك الواد الغريب ده وقاله ايه يا جميل مش هتيجى باه
وكانت كل المنطقه بتضرب فيه بما فيهم القهوجى والبت كمان
وفين وفين لما عرفت اشوفه وطبعا تقريبا كده كان مات
بصلى وقالى
حرمت اعد على كافتريات تانى
قولتله يا اخى قول حرمت اعاكس تانى
قالى بس برضه كانت هتيجى معايا البنت دى وقبل ميكمل قريت عليه الفاتحه وهربت منه

حكاية صاحبى

صاحبى ده حكايته حكايه
مقضيها بالطول وبالعرض وعايش الدنيا ولا همه حاجه
بيحب حوارات البنات وبيحب مشيهم اوى وبيعز كل بنت يعرفها زى عنيه
مبداه فى الحياه ان القلب يساعى مليون بنت مش واحده زى ما كانوا بيقولوا
عرف كتير وقليل ووصل معاهم لكل اللى عايزه ومخلاش حاجه معملهاش
وبيشرب مخدرات ومظبط دماغه ومعليها دايما لفوق
كنت دايما اشوفه قادر انه يوصل لاى بنت ويعمل معاها اللى هو عايزه
وياما كنت اقوله على بنت محترمه جدا وبرضه مبيسبهاش
حتى المتجوزين كان له نصيب معاهم واحيانا كمان جوه بيوتهم
صاحبى ده ممكن يكون وحش وممكن كلنا نكرهه
ولا ايه يا صاحبى
احتمال كبير اكون وحش ولو حد عرف قصتى دى يكرهنى
بس بجد انا مش مبسوط
اى بنت بعرفها بكون ناوى خير ونفسى تطلع مؤدبه
بس بلاقى فى الاخر انها بتطلع زى غيرها وعايزه قلة الادب
دورت كتير والله على واحده مؤدبه بس ملقتهاش
حتى اللى هما متجوزين قدرب اوصل معاهم للى عايزه
زهقت من كتر ما بيحصل كده ونفسى فى حد يصدنى
نفسى واحده تضربنى وتقولى فاكرنى زى اى واحده
نفسى واحده فعلا تكون شريفه متكونش بتتصنع ازاى تكون شريفه
تفتكر هلاقى
والله يا صاحبى انت مشكلتك مشكله
لانك اكيد هتطلع وحش فى كل اللى عملته ده
ولانك حكمت على الكل ان مفيش بنت تنفعلك
اكيد يا صاحبى فيه بنات كويسين ومحترمين
بس نصيبك هتشوفه غصب عنك وهتلاقيه
مش حاجه غريبه اللى بيحصل ده
نفسره ازاى ونقول ايه
يمكن صاحبى ده وحش فعلا
بس ليه كل دول بيوافقوه وبيقدر عليهم
ليه عدت حاسس ان كل حاجه دلوقتى بات عادى
ليه اللى بيقول حب دلوقتى يكون اهبل وميعرفش حاجه
وليه الشباب تعبان فى حياته وبيحاول يهرب منها
مخدرات وميه وكل التوهان اللى فى الدنيا
اصبحوا اساسى فى الحياه ومينفعش من غيرهم
مش قادر احكم عليك يا صاحبى
اقول عليك انت السبب ولا اللى عرفتهم السبب ولا الدنيا هى السبب
بيتهيالى الدنيا والظروف دلوقتى هى السبب فى اللى بيحصل
وعشان كده انت براءه يا صاحبى وهتفضل صاحبى